Ai 26 de setëmber 2010 iel unì benedì y giaurì ufizialmënter, cun la prejënza de truep zitadins y autoriteies, l Zënter Manifestazions Cultureles "Tublà da Nives", na strutura de livel architetonich aut cun cater selfs sun doi partimënc cun na spersa de 320 m² de ndut. Si stil va dal rustical al modern, cun lën y scipa, reprejentan l vedl (tradizion) y l nuef (rinuvazion) cun funzion y fin defin culturel. Pervia de si posizion urbanistica y n cont dl’architetura iel n zënter drët adatà per d’uni sort de manifestazions cultureles, coche mostres de ert o storiches, prejentazions, cunferënzes, simposiums, ert leterera y de mujiga y nsci inant. Sciche prima gran mostra oven metù a jì la mostra dal titul "Mi plu bel pez", ulache duc i zitadins y duta la zitadines de Sëlva fova unic nviei a fé pea.
Tublà da Nives by night
L Tublà da Nives ntan l inviern
Architetura
L cunzet d’architetura dl Zënter culturel Tublà da Nives lieia adum la forma archetipica dl tublà y la sensazion ciauda che l lën dà ora cun la forma chedra, lizia y minimalistica dla costruzion de scipa. N à mantenì l tublà y l à adatà. La pert de scipa fej unì majera la lerch da garat, lascian ntënder ciuna che ie si destinazion. Scebën che l cubus de scipa semea de avëi bele abù si tëmp tl’architetura, ie chësta strutura mpo mo bona de nes fé cialé ca. Sce la cësa Farnsworth de Van der Rohe semea de vester tl aier y la Glass House de Johnson mé de arziché l fonz, lascia l proiet de Perathoner vester defin la fundamëntes. Tres chësta dezijion criativa se lascia la pert de scipa, dantaldut via per l di, udëi ora cun spidlamënc te si scipes y canche la lums dedite se mpëia iel mé da udëi n tët tenì su da stizes sutiles, na strutura che ti semea a na mëisa che se ërj su liedia tla cuntreda. Chësc ngrandimënt dla strutura, te na maniera uluda autramënter de coche n ie usei, sënta ite l tublà te n cuntest modern nuef.
Fins dla lia culturela
L zënter culturel se tol dant de ti dé lerch a manifestazions cultureles sciche mostres de ert persuneles o coletives, reprejentazions de vel’ argumënt, storiches, scientifiches o scientifich-natureles, prejentazions, cunferënzes, simposiums, manifestazions artistiches, letereres, de mujiga, film o cinematografiches y multimedieles. Tlo possel nce unì metù a jì ancuntedes danter cumëmbri y d’autra assoziazions cultureles per l’ucajion de vel’ festa y d’autri mumënc de mpurtanza. L ie oradechël mesun lauré deberieda cun galaries d’ert y museums d’ert sciche nce de mëter a jì deberieda proiec culturei cun scoles y istituzions publiches.
Sala dla mostres 01 - zona ntreda
Ausstellungssaal 02 - jubàs
Sala dla mostres 03 - cubus de scipa
Sala dla mostres 04 - tublà
Lia culturela "Tublà da Nives"
Ai 23 de auril 2012 iel unì metù su la "Lia culturela Tublà da Nives", ai 7 de lugio 2012 iel pona unì lità l prim cunsëi diretif y l presidënt, ai 27 de agost 2012 iel nce unì numinà l prim cunsëi scientifich y dopro l "art director" tla persona dl dr. Leo Senoner.
Cunsëi diretif:
Cunsëi scientifich:
Duta la zitadines y duc i zitadins nteressei al’ert y ala cultura de Sëlva y de Gherdëina ie nviei a deventé cumëmbri sustenidëures dla lia culturela "Tublà da Nives" y giapé nsci i nvic a duta la manifestazions y ala sentedes genereles, ulache uniun de Vo à l dërt de vela y de unì lità te un di organns dla lia. L cuntribut ie de 15,00 euro y possa unì paià ite pra la Cassa Raiffeisen Gherdëina.
IBAN IT77I0823858890000300040703
Nëus se ncunferton sun Vosta iscrizion.
